Mark 11

Zisasiyaŋ Zelusalem mka teman mopme am ekŋenaŋ zem olioli mpeme mowezin

(Matiyu 21:1-11; Luk 19:28-40; Zân 12:12-19)

1Zisas nembaŋane ekŋenaŋ Zelusalem mka teman sokŋanik moti Betpasi ma Betani mka zut Olip kalaŋan tazin ke mopataŋ zemti Zisasiyaŋ nemba zut zemidemti zeye, “It mkaen kainde mot pataŋ zenzeŋak ekmalu doŋki nembaŋaŋ ŋen tegaŋ opempepeŋaŋ am ŋenaŋ dukŋan ŋen ewe ku mamaŋaŋ ke tapme ekti kwalet mti koselup. 3Metakwaletnepemalu an ŋenaŋ, ‘It zigok msâgât takwalelup?’ idayaŋkwesime an keyet kapigok zeselup, ‘Amobotnaŋaŋ kapi mmet samalu egaŋ mmaneti naman sakwep ewe mkoti mundumanak gilik zem opempepeyet zeme kot takwalelup.’ Kegok zemalu egaŋ nâmideme kwalet mti koselup.”

4Kegok zeme nemba zut egelaŋ meti doŋki nembaŋaŋ tegaŋ mka set keyet solonan opempepeŋaŋ tapme ekti metakwalepmalu 5am notnaŋ sokŋan tabienaŋ idikti zewien, “It kuwiekiyet doŋki nembaŋaŋgat tekŋaŋ ke takwalelup?”

6Zeme egelaŋ Zisasiyaŋ zet zemideye keyet kataŋ zemalu nâmideme egelaŋ tekŋaŋ 7kwaleti Zisasmagen mmeti melakanduŋit gulumti doŋki bisetnaŋ palen bempemalu Zisasiyaŋ keyet palen mototati 8Zelusalem mka teman mopme am sambe penaŋaŋ melakanduŋin ma notnaŋ ekŋenaŋ tep belak set ganzenan tapmege bee mutumti siŋsasatnaŋ melesiŋ kot selen yeŋgemebien. 9Mti bembuluŋ meti ŋagak ma kwisak temaŋ mti zewien,

“Kot ndapmukulem mti ndaŋgalaŋ nde! An kapi Amobotnaŋmagengatnaŋ ndamukulem minndesâgât kozingapmti kopme kwizet buŋamaŋ mwati sesewatpene. 10Yeŋsokŋ Dewit egaŋ am indadamuŋ mme dolakŋaŋ mambien. Keyet kataŋ an kapiyaŋ nin kot ndamukulem minndemti aŋgalaŋndesâgât kozingat kopme oloŋen mti sesewatpene!”
(Sam 118:26)

11Kegok mpeme egaŋ Zelusalem mkaen Zuda am ekŋengalen sesewat mka temaŋ keyet keŋan moti kwitnaŋ kwitnaŋ sambe bempeme wemege ke tokwati ekmâge. Mti ke manepeme msat gasi penaŋ beyeyepm nembaŋane 12 indatime Zelusalem mka katipemti Betani mkaen mebien.

Zisasiyaŋ tep kwitnaŋ pik saik kumpeye

(Matiyu 21:18-19)

12Mewembienaŋ mseŋan ewe gilik zem Zelusalem mka temanenak kosât koti Zisasiyaŋ meuyet penaŋ mge. 13Mti ekpeme mepme tep kwitnaŋ pik ŋen sinaŋ kundumaŋ temaŋ tapme ekti, “Wa katnaŋ ŋen tazinaŋ mâtâti nsap,” zemti met timapme beye. Pik katnaŋ eliligalen kanaŋ ewe ku beye. 14Zisasiyaŋ pik tepmaŋgat zet kapigok zeye “Am ŋenaŋ gâgât kadi ŋen ewe ku nimbe.” Kegok zeme nembaŋane nâmbien.

Zisasiyaŋ Zelusalem Zuda amgalen sesewat mka temanen mege

(Matiyu 21:12-17; Luk 19:45-48; Zân 2:13-22)

15Kegok zeme ekŋenaŋ Zelusalem mkaen meti Zisasiyaŋ sesewat mka temaŋ keŋan mepmoti ekme amnaŋ kwaweti sâpe sâpe bumbuyet age ma mânep bemkwiti kwiti tapmme indikti egaŋ mânep mundum âtât peme kutume age mundumaŋ setnaŋ ke mâtâtindemâpme kwawepmâbien. 16Kegok mti muluwaŋ keboŋ ke sesewat mka temanen ewe kwitnaŋ kwitnaŋ timet timkot mimiyelen zemkulumindeye. 17Mti zet kapigok diindoye, “Kawawaŋgalen Zet Itnaŋanen meluwaŋ ŋen kapigok mimiŋaŋ tazin,

‘Nâlen mkannan am msat sambeyaŋ kwaweti dundundu mulup mbep!’
(Aizaya 56:7)

Âpme in naman mka kapi mme,

‘Am kambu titi ekŋengalen mkanok tabein.’ “
(Zelemaia 7:11)

18Zisasiyaŋ kegok mme sâpe sâpe bumbu an ŋeŋaŋ ma zii zet zikat indanda an ekŋenaŋ ŋeŋin zime set ŋen aikti Zisas kume gakikiyelen nâmbien. Keyaŋgut am sambeyaŋ Zisasiyet zetnaŋgat nâme mobotnaŋ mambemtangapmti kiŋgati belak peme tage.

19Âpme Zisasmak nembaŋane ilinsakwep ke manepeme tambusâgât tapmme ekŋenaŋ Zelusalem mka temaŋ katipemti Betani mkaenegak gilik zem mebien.

Pik tep memuŋ beye

(Matiyu 21:20-22)

20Mewembienaŋ msame tambuŋan gilik zem koti ekme pik tep piwan memuŋaŋ penaŋ bem tapme ekti 21Pitayaŋ Zisasiyaŋ zet zeye ke otnâmti zeye, “An zikat indanda, geŋ saŋenen pik tep saik kumpemanan piwan memuŋaŋ bem tazingat ekbak!”

22Âpme Zisasiyaŋ dopmaŋ kapigok gilik zem indaye, “Neŋ zet penaŋ zema nâit, inmagengatnaŋ ŋenaŋ keŋ zutpiŋ Kawawaŋgat nâmkiŋpewe beme nukŋaŋ notnaŋ kalaŋ nemboŋ keyet kapigok zewe, ‘Geŋ epeemti nembuen towet,’ zemti zetnnaŋgat penaŋaŋ sokbembeyet zemti keŋ zutpiŋ tati dunduwe beme nukŋaŋ kalaŋnemboŋ keyaŋ ŋep etumti nembuen metowebe. 24Neŋ ingat pigok penaŋ zema nâit, in nâmkiŋpepe kaliŋaŋ mti kwitnaŋ kwitnaŋ ke penaŋ sokbemindandayelen e nâmkatikbemti dunduwewen ŋep sokbemindawe. 25Âpme geŋ dundusât mbanik kan keyet am ŋenmak kalalaŋit tazin beme yomaŋ ke katikpewanik. Katikpemane Kawawaŋ kululuŋen main egaŋ kegogak gâlen yomdi katikpewe. 26Âk geŋ an ŋenmak yomit tazin ke ku katikpewanik beme Bipdi kululuŋen main egaŋ kegogak gâlen yomdi ku katipewe.”

“Zisasiyaŋ mulup winde deyet timti mamin,” zemti Zuda an ŋeŋaŋ ekŋenaŋ yaŋkwesiwien

(Matiyu 21:23-27; Luk 20:1-8)

27Zisasiyaŋ zet kegok zemdelaŋ zeme ekŋenaŋ naman Zelusalem mkaen ewe mesâgât mebien. Meti Zisasiyaŋ ewe sesewat mka temanen moti tatokwapme sâpe sâpe bumbu an ŋeŋaŋ ma zii zet zikat indanda an ma sesewat mka temaŋgalen damuŋ notnaŋ ekŋenaŋ ekmagen kot ondekti yaŋkwesiwien, “Geŋ kwiyaŋ nâmgemti zemgeme kot am sesewat mkaen indamâtnak ma muluwaŋ mamanamaŋ notnaŋ mamnik? Keyet yaŋaŋ zemane nâne.”

29Yaŋkwesime Zisasiyaŋ dopmaŋ pigok diindoye, “Neŋ ŋeŋaŋ yaŋkwesisi ŋen yaŋkwesima in keyet dopmaŋ ŋeŋaŋ gilik zem nameŋgut neŋ kwiyaŋ nâmneme muluwaŋ mamanamaŋ mamiap keyet yaŋaŋ kegogak zema nâseip.” 30Zemti pigok indayaŋkwesiye, “Zân tu zululut an egaŋ mulup mam ke Kawawaŋmagengatnan ma ammagengatnan timam ze zeme nâmbi?”

31Kegok indayaŋkwesime ekŋenaŋ ilinak zenâ zenâ mti zewien, “Nin ‘Zânaŋ mulup Kawawaŋaŋ saye,’ zesenup beme egaŋ zesem, ‘Âpme kwilekiyet in egat zetnaŋ ku manâmkiŋpeip?’ dindosem. 32Ma nin, ‘Ammagengatnan timti mamm,’ zesenup beme naman am sambeyaŋ, ‘Egat nâme golaŋ zenze an mobotnaŋ temaŋ,’ manzeip keyepmti zet ke nâmti ndoseipmagen zemti kiŋgati peme tage.”

33Mti Zisasiyet zewien, “Nin egat yaŋaŋ ku nânup.”

Zeme Zisasiyaŋ zeye, “In egat yaŋaŋ ku nâip keyepmti neŋ kwiyaŋ nâmneme mulup kapi mamiap keyet yaŋaŋ e kegogak ku diindosap.”